इंडिया क्राइम न्यूज़ ऑनलाइन
(संपादक सुरेश गुप्ता)
पुणेः पुण्यातील समर्थ पोलीस ठाण्याच्या हद्दीत शेअर बाजारात गुंतवणुकीच्या आमिषाने सायबर चोरट्यांनी एकाची १९ लाख रुपयांची फसवणूक केल्याची घटना घडली आहे. याप्रकरणी सायबर चोरट्यांविरुद्ध समर्थ पोलिसांनी गुन्हा दाखल करण्यात आला आहे. याबाबत अभिजीत विष्णुकांत गावडे (वय ४५ वर्ष, रा. सोमवार पेठ) यांनी समर्थ पोलीस ठाण्यात तक्रार दिली आहे.
पोलिसांनी दिलेल्या माहितीनुसार, फिर्यातदार अभिजीत गावडे सोमवार पेठेत राहायला आहेत. सायबर चोरट्यांनी त्यांच्या मोबाइल क्रमांकावर संदेश पाठविला. त्यात शेअर बाजारात गुंतवणूक केल्यास चांगला परतावा मिळेल, असे प्रलोभन त्यांना दाखवण्यात आले. गावडे यांनी खात्यात रकम जमा केली अशी माहिती अधिक चौकशीत चोरट्यांनी पोलिसांना दिली. सुरुवातीला चोरट्यांनी गावडे यांना परतावा दिला.
त्यानंतर गेल्या महिनाभरात गावडे यांनी चोरट्यांच्या खात्यात वेळोवेळी १९ लाख रुपये जमा केले. मात्र, त्यानंतर चोरट्यांनी गावडे यांना परतावा देणे बंद केले. दरम्यान, आपली फसवणूक झाल्याचे लक्षात आल्यानंतर गावडे यांनी पोलिस ठाण्यात धाव घेत तक्रार दिली.
गुन्हे शाखेचे पोलीस निरीक्षक चेतन मोरे तपास करीत आहेत.
