इंडिया क्राइम न्यूज़ ऑनलाइन
(संपादक सुरेश गुप्ता)
पुणेः जुन्या वैमनस्यातून एका १७ वर्षीय तरुणावर तीन अल्पवयीनांनी अचानक हल्ला करत गंभीर जखमी केल्याची घटना शिवाजीनगर रेल्वे स्थानकाजवळ बुधवारी (२ जुलै) दुपारी घडली. या प्रकरणी शिवाजीनगर पोलीस ठाण्यात खुनाचा प्रयत्न केल्याचा गुन्हा दाखल करण्यात आला आहे. जखमी तरुणाचे नाव अभिषेक गणेश दोरास्वामी (वय १७, रा. हडपसर) असे आहे. याप्रकरणी त्याचे वडील गणेश राजन दोरास्वामी (वय ४६) यांनी पोलीस ठाण्यात तक्रार दाखल केली आहे.
घटनेचा तपशील
पोलीस सूत्रांकडून मिळालेल्या माहितीनुसार, काही महिन्यांपूर्वी अभिषेकचा गल्लीतील काही मुलांशी वाद झाल्याची माहिती आहे. त्यामुळे पालकांनी त्याला काही काळासाठी हडपसर येथे राहायला पाठवले होते. दरम्यान, बुधवारी दुपारी अभिषेक आपल्या आई-वडिलांना भेटण्यासाठी शिवाजीनगर भागात आला होता. सुमारे पावणेतीनच्या सुमारास, तो रेल्वे स्थानकाजवळील एका सार्वजनिक स्वच्छतागृहात गेला. त्याच वेळी, तीन अल्पवयीन मुले तिथे दबा धरून बसले होते. तो बाहेर येताच त्याच्यावर धारदार शस्त्राने हल्ला करण्यात आला, ज्यात तो गंभीर जखमी झाला. डोक्यावर, पाठीवर आणि हातावर गंभीर जखमा झाल्या असून त्याला तातडीने एका खासगी रुग्णालयात दाखल करण्यात आले आहे. सध्या त्याच्यावर उपचार सुरू आहेत.
पोलिसांकडून तपास सुरू
या प्रकरणी पोलिसांनी तीन अल्पवयीन आरोपींविरुद्ध भारतीय न्याय संहितेनुसार खुनाचा प्रयत्न केल्याचा गुन्हा नोंदविला आहे. पोलिस उपनिरीक्षक अजित बडे यांच्याकडे या प्रकरणाचा तपास सोपवण्यात आला आहे. घटनास्थळाजवळील CCTV फुटेज, साक्षीदारांचे जबाब आणि वैद्यकीय अहवालाच्या आधारे पुढील तपास सुरू आहे.
