इंडिया क्राइम न्यूज़ ऑनलाइन
(संपादक सुरेश गुप्ता)
पुणे, वारजेः पुणे शहरातील वारजे भागात सध्या रस्त्यांची अवस्था अत्यंत वाईट झाली आहे. ठिकठिकाणी पडलेल्या मोठ्या खड्ड्यांमुळे वाहनचालक आणि नागरिकांना रोजच्या प्रवासात मोठ्या अडचणींचा सामना करावा लागतोय. वारजे परिसरातील रस्त्यांची डागडुजी नीट न झाल्यामुळे डांबरी रस्त्यांवर आणि सिमेंट काँक्रिटच्या रस्त्यांवरही खड्डे पडले आहेत. रस्ता एकसारखा नसल्यामुळे गणपती माथा ते वारजे उड्डाणपुलापर्यंतच्या रस्त्याला अनेक ठिकाणी भेगा पडल्या आहेत. या खड्ड्यांमुळे मोठ्या प्रमाणात वाहतूक कोंडी होते, ज्यामुळे लोकांचा वेळ वाया जातो आणि त्रास वाढतो.
मोठे खड्डे असल्यामुळे वाहनचालकांना त्याचा अंदाज येत नाही, ज्यामुळे अपघातांचा धोका खूप वाढला आहे. स्थानिक नागरिकांनी सांगितले की, “वारजे परिसरात खड्ड्यांमुळे गाड्यांची गती खूप कमी होते. यामुळे सतत वाहतूक कोंडी होते. या कोंडीमुळे नागरिकांचा खूप वेळ वाया जातो आणि त्यांना मनस्ताप सहन करावा लागतो.” यामुळे, नागरिकांनी लवकरात लवकर या रस्त्यांची दुरुस्ती करण्याची मागणी केली आहे.
