इंडिया क्राइम न्यूज़ ऑनलाइन
(संपादक सुरेश गुप्ता)
पिंपरी : पिंपरी-हिंजवडी परिसरात एक हृदयद्रावक अपघात घडला आहे. गणपतीचे बुकिंग करण्यासाठी दुचाकीवरून निघालेल्या 11 वर्षाच्या मुलीला सिमेंट काँक्रीट मिक्सर ट्रकने चिरडले. या भीषण अपघातात मुलीचा जागीच मृत्यू झाला असून, हा संपूर्ण प्रकार सीसीटीव्ही कॅमेऱ्यात कैद झाला आहे.
मृत मुलीचे नाव प्रत्युषा संतोष बोराटे (वय 11) असे असून ती आपल्या आईसोबत गणपतीचे बुकिंग करण्यासाठी जात होती. यावेळी मागून आलेल्या मिक्सर ट्रकने त्यांच्या दुचाकीला जोरदार धडक दिली. धडकेनंतर प्रत्युषा रस्त्यावर पडली आणि ट्रकच्या मागच्या चाकाखाली चिरडली गेली. आईच्या डोळ्यासमोर घडलेल्या या घटनेमुळे परिसरात प्रचंड हळहळ व्यक्त होत आहे.
अपघातानंतर हिंजवडी पोलिसांनी तात्काळ कारवाई करत मिक्सर ट्रक चालक फरहान मुन्नू शेख, ट्रक मालक प्रदीप मारुती साठे आणि सुपरवायझर प्रसाद मंडलिक यांच्यावर सदोष मनुष्यवधाचा गुन्हा दाखल केला आहे, अशी माहिती सहाय्यक पोलिस आयुक्त सुनील कुन्हाडे यांनी दिली.
दरम्यान, या अपघातानंतर संतप्त कुटुंबीयांनी तीव्र भावना व्यक्त केल्या आहेत. प्रत्युषाच्या आई-वडिलांनी दुखाने हंबरडा फोडत म्हटले, “माझ्या मुलीचा खून बिल्डर आणि त्याच्या ट्रक चालकामुळे झाला आहे. त्यांना पाठीशी घालण्यात येत आहे. कठोर कारवाई न झाल्यास आम्हाला न्याय मिळणार नाही. नसेल जमले तर माझाही जीव घ्यावा.
हिंजवडी व आसपासच्या आयटी नगरीत गेल्या काही वर्षांपासून अवजड वाहनांमुळे अनेक अपघात घडले असून अनेकांनी प्राण गमावले आहेत. तरीही बेदरकार वाहनचालकांवर ठोस कारवाई होत नसल्याची नाराजी नागरिकांतून वारंवार व्यक्त केली जात होती. मात्र या घटनेनंतर पोलिसांनी अशा अवजड वाहनांवर आळा घालण्यासाठी विशेष मोहिम सुरू केल्याचे सांगितले आहे. हिंजवडी परिसरात बेदरकारपणे धावणाऱ्या ट्रक आणि मिक्सर वाहनांवर आता कठोर कारवाई होणार असल्याची माहिती पोलिसांकडून देण्यात आली.
