इंडिया क्राइम न्यूज़ ऑनलाइन
(संपादक सुरेश गुप्ता)
पुणे : ससून रुग्णालयात राहून ड्रग रॅकेट चालवणारा ललित पाटील ससूनमध्ये राहण्यासाठी रुग्णालयातील अतिवरिष्ठांना प्रतिदिन ७० हजार रुपये देत असल्याची माहिती ससूनमधील विश्वसनीय सूत्रांनी दिली. त्याचे पेमेंट कॅशमध्ये आणि आठवड्याची रक्कम एकदाच घेतली जात होती आणि त्याचे कलेक्शन ससून रुग्णालयातील अतिवरिष्ठांचा ‘खास’ असलेल्या क्लास-फोरकडून केले जात असल्याचेही सूत्रांचे म्हणणे आहे. ससून रुग्णालयाचे अधिष्ठाता संजीव ठाकूर हे न्यायालयाच्या तारखेनिमित्त मुंबईला असल्याने संपर्क होऊ शकला नाही.
तीन वर्षांपूर्वी अटकेत असलेला ललित पाटील १६ महिन्यांपासून ससूनमध्ये पाहुणचार घेत आहे. ड्रग रॅकेट सापडले अन् तो सहीसलामत पळालादेखील. ससूनमधील १६ नंबरच्या कैद्यांच्या वॉर्डमध्ये त्याची खास बडदास्त ठेवली जात होती. येथे त्याच्याकडे सव्वादोन लाखांचे आयफोन होते.
१६ महिने ससूनचा पाहुणा
ललित तीन वर्षांपूर्वी जून २०२० मध्ये अटक झालेला आहे. तेव्हापासून त्याची येरवडा कारागृहात रवानगी केलेली आहे. याला ३९ महिने झाले आहेत. त्यांपैकी त्याने जवळपास १६ महिने ससूनमध्येच मुक्काम झोडला.
‘क्लास फोर’चा कर्मचारी मध्यस्थ?
ससून रुग्णालयात अतिवरिष्ठांचे ‘अर्थ’कारण सांभाळणारा क्लास फोरचा कर्मचारी यामध्ये मध्यस्थ आहे. हा कर्मचारी ससून रुग्णालयात महागडी फोर व्हीलर घेऊन येतो. त्याच्या अनेक प्रॉपर्टीज आहेत.
विश्वसनीय सूत्रांनी ‘लोकमत’ला दिलेल्या माहितीनुसार ललित हा रुग्णालयातूनच मेफेड्रॉन ड्रगची तस्करी करत होता. त्यातून तो कोट्यवधींचा व्यवहार करीत होता. १६ नंबर वॉर्डमध्ये उपचारांसाठी राहू देण्यासाठी व सर्व काही बडदास्त ठेवण्यासाठी तो दिवसाला ७० हजार रुपये रोख मोजत होता. सात दिवसांचे पैसे अॅडव्हान्समध्ये घेतले जात होते..
