इंडिया क्राइम न्यूज़ ऑनलाइन
(संपादक सुरेश गुप्ता)
पुणे : येरवड्यातील गोल्फ क्लब रस्त्यावर भरधाव मोटारीच्या धडकेत दुचाकीस्वार अल्पवयीन मुलाचा मृत्यू झाल्याची घटना घडली. अली मोहम्मद शेख (वय 14, रा. अल कुरेश हॉटेलमागे, कामराजनगर, येरवडा) असे मृत्यु झालेल्या दुचाकीस्वार अल्पवयीन मुलाचे नाव आहे. तर हजरा मुजफ्फर अन्सारी (वय 12 वर्ष) असे जखमी झालेल्या मुलीचे नाव आहे. याप्रकरणी अलीचे वडील मोहम्मद गुलाब शेख (वय 40 वर्ष) यांनी येरवडा पोलीस ठाण्यात फिर्याद दिली आहे. याप्रकरणी अज्ञात मोटारचालकाविरुद्ध गुन्हा दाखल करण्यात आला आहे.
पोलिसांनी दिलेल्या माहितीनुसार, अली आणि त्याची मैत्रीण हजरा हे दोघे सोमवारी (14 एप्रिल) ला दुपारी 3 वाजण्याच्या सुमारास येरवडा भागात जलतरण तलावात पोहोचण्यासाठी दुचाकीवरून जात होते. तेंव्हा गोल्फ क्लब चौकाकडे जाणाऱ्या रस्त्यावर भरधाव मोटारीने त्याच्या दुचाकीला पाठीमागून येत धडक दिली. झालेल्या अपघातात अली आणि हजरा दोघेही गंभीर जखमी झाले. त्यानंतर त्यांना तातडीने खाजगी रुग्णालयात हलवण्यात आले. मात्र उपचारादरम्यान अलीचा मृत्यू झाला.
अपघातानंतर मोटारचालकाने घटनास्थळावरून पळ काढला. पोलीस गोल्फ क्लब चौक परिसरातील सीसीटीव्हीचे फुटेज तपासत त्याचा शोध घेत आहेत. वरिष्ठ पोलीस निरीक्षक रवींद्रकुमार शेळके यांनी घटनास्थळी भेट दिली. पोलीस उपनिरीक्षक नंदकुमार केकाण तपास करत आहेत.
