Thursday, June 13, 2024
Homeक्राईम न्यूजभविष्यात चित्र बदलण्याची ताकत आपल्यात; लोकसभेच्या निकालानंतर अजित पवारांची पहिली प्रतिक्रिया

भविष्यात चित्र बदलण्याची ताकत आपल्यात; लोकसभेच्या निकालानंतर अजित पवारांची पहिली प्रतिक्रिया

इंडिया क्राइम न्यूज़ ऑनलाइन

(संपादक सुरेश गुप्ता)

मुंबई : अवघ्या देशाचं लक्ष लागून राहिलेल्या महाराष्ट्रातून लोकसभेचा निकाल समोर आला आहे. अत्यंत उत्साहवर्धक अशा या निकालात महाविकास आघाडीने घवघवीत यश मिळवलं आहे. तर महायुतीच्या वाटेला निराशाच आली आहे. उपमुख्यमंत्री अजित पवारांनी यंदाच्या लोकसभेत एकूण चार जागा महायुतीकडून लढवल्या होत्या. त्यामध्ये बारामती ही अत्यंत अस्मितेचा मतदारसंघ अजित पवारांच्या वाटेला गेली होती. पण या जागेवरही अजित पवारांच्या हाती निराशाच पडली. पण आता अजित पवारांनी प्रतिक्रिया देत त्यांच्या कार्यकर्त्यांना विधानसभेसाठी तयारी लागण्याचं आवाहन केलं आहे.

काय म्हणाले अजित पवार?

लोकसभा निवडणुकीचे निकाल जाहीर झाले आहेत. या निवडणुकीत राष्ट्रवादी काँग्रेस व महायुतीला मतदान केलेल्या समस्त मतदार बंधु-भगिनींचे सर्वप्रथम मनापासून आभार मानतो. पंतप्रधान नरेंद्र मोदी यांच्या नेतृत्वाखाली ‘एनडीए’नं बहुमताचा टप्पा गाठला, त्याबद्दल प्रधानमंत्री महोदयांचं आणि ‘एनडीए’च्या सर्व विजयी उमेदवारांचं अभिनंदन करतो. ‘एनडीए’च्या विजयासाठी गेले काही महिने सातत्यानं परिश्रम घेतलेले सर्व नेते, कार्यकर्ते, हितचिंतक, मतदार बंधू-भगिनी सर्वांना धन्यवाद देतो.

पुढे बोलताना म्हणाले, राष्ट्रवादी काँग्रेस आणि महायुतीला राज्यात अपेक्षित यश मिळू शकलं नसलं तरी, भविष्यात हे चित्र बदलण्याची ताकद आपल्यात आहे. कुठलंही अपयश अंतिम नसतं. अपयशानं खचून न जाता नव्या उत्साहानं, उमेदीनं सर्व कार्यकर्त्यांनी पुन्हा एकदा स्वतःला लोकसेवेला वाहून घ्यावं. राष्ट्रवादी काँग्रेस आणि महायुतीच्या नेत्यांकडून निकालाचं विश्लेषण केलं जाईल. त्यांच्या निष्कर्षाप्रमाणे राष्ट्रवादी काँग्रेस आणि महायुतीचे सर्व कार्यकर्ते चार महिन्यांनी होणाऱ्या विधानसभेच्या निवडणुकीसाठी कामाला लागतील.

सुनील तटकरेंचं देखील अभिनंदन

सुनील तटकरे हे रायगड लोकसभा मतदारसंघातून पुन्हा एकदा मोठ्या मताधिक्यानं निवडून आले आहेत. त्यांचं मनापासून अभिनंदन करतो. अरुणाचल विधानसभेत राष्ट्रवादी काँग्रेसचे तीन आमदार निवडून आले आहेत. पक्षासाठी हे अभिमानास्पद यश आहे. पक्षाच्या या विजयी उमेदवारांचं हार्दिक अभिनंदन करतो. देशात लवकरंच सलग तिसऱ्यांदा स्थापन होणारं ‘एनडीए’चं सरकार जनतेच्या आशा-आकांक्षांची पूर्तता करण्यात, देशाला महाशक्ती बनवण्यात यशस्वी होईल, याची खात्री आहे. प्रधानमंत्री मा. श्री. नरेंद्र मोदी साहेब आणि ‘एनडीए’च्या सर्व विजयी उमेदवारांचं पुनःश्च अभिनंदन !

RELATED ARTICLES
- Advertisment -

Most Popular

Recent Comments