इंडिया क्राइम न्यूज़ ऑनलाइन
(संपादक सुरेश गुप्ता)
मुंबई | 21 ऑक्टोबर 2023 : गेल्या काही दिवसांत चोरीच्या दोन वेगवेगळ्या घटना उघडकीस आल्या आहेत ज्यामध्ये फूड डिलीव्हरी अॅपसाठी काम करणारे डिलीव्हरी एजंट्स फोन चोरी करताना कॅमेऱ्यात कैद झाले आहेत. रात्रीच्या वेळी सोसायटीच्या गेटवर असलेल्या सुरक्षारक्षकाचे लक्ष नसताना किंवा ते थोडा वेळ विश्रांती घेत असताना या डिलीव्हरी एंजट्सनी त्यांचा कार्यभाग साधत फोन चोरले. या दोन्ही घटना सीसीटीव्ही कॅमेऱ्यात कैद झाल्या असून स्विगी आणि झोमॅटो सारखी फूड डिलीव्हरी अॅप कंपन्या त्यांच्या एजंट्सची पार्श्वभूमी नीट तपासतात की नाही हा प्रश्न सध्या उपस्थित होत आहे. कारण त्यांना सोसायटीमध्ये आणि पर्यायाने लोकांच्या घरापर्यंत सहज प्रवेश मिळतो.
चोरीच्या या दोन्ही घटनांपैकी पहिली ही कलिनातील गोल्डन रॉक सोसायटीमध्ये तर दुसरी चोरी ही कांदिवलीच्या चारकोप भागातील सेक्टर 8 मध्ये घडल्याचे समोर आले. दोन्ही घटनांमध्ये डिलीव्हरी एजंट्सनी त्यांची वाहने सोसायटीच्या गेटच्या बाहेर पार्क केली होती.
सहा महिने पैसे साठवून विकत घेतलेला मोबाईल क्षणात गायब यापैकी पहिली चोरी ही 12 ऑक्टोबर रोजी रात्री 10.30 वाजता गोल्डन रॉक सोसायटीत घडली. गेल्या तीन वर्षांपासून तेथे कार्यरत असलेले सुरक्षा रक्षक रमेशकुमार मंडल यांचा मोबाईल अज्ञात स्विगी डिलिव्हरी बॉयने चोरून नेला. मंडल यांच्या सांगण्यानुसार, डिलीव्हरी बॉय त्याच्या सायकलवर आला होता. चोरीपूर्वी सायकल त्याने सोसायटीच्या गेटच्या बाहेर पार्क केली. त्यानंतर त्याने(सुरक्षारक्षकाच्या) केबिनमधून फोन चोरला. मंडल यांनी गेले सहा महिने पै न पै साठवून 5 ऑक्टोबर रोजी 14,000 रुपये किमतीचा नवीन मोबाइल फोन विकत घेतला. तो हरवल्याचे लक्षात आल्यावर त्यांनी सर्वत्र शोधाशोध केली पण फोन कुठेच सापडला नाही. अखेर त्यांनी सोसायटीचे चेअरमन आणि सेक्रेटरी यांच्यासह सोसायटीच्या सदस्यांना या चोरीबाबत कळवले. त्यानंतर त्या सर्वांनी तेथील सीसीटीव्ही फुटेज चेक करण्याचा निर्णय घेतला.
स्विगी कंपनीचा टी-शर्ट घातलेला एक डिलीव्हरी बॉय सोसायटीत घुसला आणि केबिनमधून गार्डचा मोबाईल चोरला, असे सीसीटीव्ही फुटेजमध्ये उघड झाले. त्यानंतर मंडल यांनी ताबडतोब त्यांच्या सुरक्षा एजन्सीशी संपर्क साधला आणि त्यांनी स्विगी अधिकाऱ्यांना घटनेची माहिती दिली. 24 तासांच्या आत हे प्रकरण सोडवतील असे आश्वासन स्विगीने माझ्या बॉसला आश्वासन दिले, पण आता इतके दिवस उलटूनही चोराचा काहीच पत्ता लागलेला नाही. माझा मोबाईलही गेल्यात जमा आहे. सहा महिन्यांची माझी संपूर्ण बचत मी गमावली, असे मंडल म्हणाले.
