इंडिया क्राइम न्यूज़ ऑनलाइन
(संपादक सुरेश गुप्ता)
शिवणे : चारित्र्याच्या संशयावरुन पुण्यातील शिवणे भागात नात्याला काळिमा फासणारी घटना घडली आहे. चारित्र्यावर संशय घेत एकाने त्याच्या पत्नीला औषधांच्या गोळ्यांमधून ब्लेडचे तुकडे गिळायला लावण्याची अत्यंत क्रूर घटना शिवणे परिसरात घडली आहे. याबाबत दिलेल्या तक्रारीवरून सोमनाथ साधु सपकाळ (वय ४५ रा. समर्थ टेरेस, कामठे वस्ती, शिवणे, पुणे) याच्या विरोधात त्याची पत्नी छाया सोमनाथ सपकाळ (वय ४१) यांनी उत्तमनगर पोलीस ठाण्यामध्ये जीवे मारण्याचा प्रयत्न, कौटुंबिक हिंसाचार कायद्यासह विविध कलमांखाली तक्रार दिली आहे. पुण्यातील शिवणे गावामध्ये हा प्रकार घडला असून ४१ वर्षीय पीडित महिलेने यासंदर्भात उत्तमनगर पोलीस ठाण्यात फिर्याद नोंदवली आहे. त्यानंतर पोलिसांनी गुन्हा दाखल करून हे अमानुष कृत्य करणाऱ्या सोमनाथ सपकाळ याला अटक केली आहे.
उत्तमनगर पोलीस ठाण्याचे वरिष्ठ पोलीस निरीक्षक किरण बालवडकर यांनी दिलेल्या माहितीनुसार, हा प्रकार ऑक्टोबर महिन्यापासून सुरू होता. गेल्या दोन महिन्यांपासून सपकाळ दाम्पत्यामध्ये अनेक वाद-विवाद सुरू होते. सोमनाथ हा अनेक वेळा त्याच्या पत्नीवर संशय घ्यायचा त्याच मुद्यावरून त्यांच्यात नेहमी वाद व्हायचे. नोव्हेंबर महिन्याच्या पहिल्या आठवड्यात सोमनाथने त्याच्या पत्नीला कॅल्शिअमच्या कॅप्सूल्स खाण्यासाठी दिल्या. ज्यामध्ये त्याने अगोदरच ब्लेडचे तुकडे टाकले होते. आणि ते तिला खायला दिले. तोंडात ब्लेडचे तुकडे तिला टोचू लागले, धारदार तुकड्यामुळे तोंडातून रक्त येऊ लागले, त्यामुळे त्याच्या पत्नीने त्या गोळ्या आणि ब्लेडचे तुकडे थुंकून टाकण्याचा प्रयत्न केला. पण क्रूर सोमनाथने तिचे काहीच न ऐकता तिला ते तुकडे तसेच गिळायला लावले. त्यामध्ये पीडित महिलेच्या गळ्यामध्ये गंभीर जखमाही झाल्या. त्यांनी वैद्यकीय तपासणी केली असता हा सगळा प्रकार समोर आला. पीडित महिलेने नराधम पतीविरोधात उत्तमनगर पोलीस ठाण्यात तक्रार दाखल केली असून पोलिसांनी आरोपी सोमनाथला अटक केली आहे. याप्रकरणी पुढील तपास वरिष्ठ पोलीस निरीक्षक किरण बालवडकर यांच्या मार्गदर्शनाखाली पोलीस उपनिरीक्षक शुभांगी पवार करीत आहेत.
