इंडिया क्राइम न्यूज़ ऑनलाइन
(संपादक सुरेश गुप्ता)
पुणे : पुण्यातील कुख्यात गुंड गजा उर्फ गजानन मारणे याला पोलिसांच्या संरक्षणात सांगली कारागृहात घेऊन जाताना हायवेवरील धाब्यावर मटण पार्टी केल्याचा धक्कादायक प्रकार समोर आला होता. या प्रकरणानंतर गजा मारणे याला न्यायालयाने मोठा धक्का दिला आहे. कोथरूडमधील आयटी कर्मचाऱ्याला मारहाण केल्याप्रकरणी महाराष्ट्र संघटित गुन्हेगारी नियंत्रण कायद्यानुसार- मकोका- दाखल गुन्ह्यात गजा मारणेचा जामीन अर्ज विशेष न्यायालयाने फेटाळला आहे.
याबाबत अधिक माहिती अशी की, केंद्रीय मंत्री मुरलीधर मोहोळ यांच्या कार्यकर्त्याला मारणे टोळीतील गुंडानी मारहाण केली होती. त्यानंतर गजा मारलेला अटक करण्यात आली होती. याप्रकरणी न्यायालयाने जामीन अर्ज फेटाळत गजा मारणेसह दहा साथीदारांविरुद्ध आरोप पत्र दाखल करण्यास न्यायालयाने गुन्हे शाखेला 30 दिवसांची मुदतवाढ दिली आहे. न्यायालयाने गजा मारणे याचा हा अर्ज फेटाळला असल्यामुळे मारणेचा मुक्काम पुन्हा जेलमध्येच असणार आहे. दरम्यान या गुन्ह्याचा तपास सुरू असल्याचे नमूद करत विशेष न्यायाधीश व्ही. आर. कचरे यांनी हा आदेश दिला.
काय आहे प्रकरण?
कोथरूडमधील भेलकेनगर येथे मारणे टोळीतील सराईतांनी केंद्रीय मंत्री मुरलीधर मोहोळ यांच्या कार्यालयात काम करणारा सॉफ्टवेअर इंजिनिअर देवेंद्र जोग नावाच्या तरुणाला बेदम मारहाण केल्याची घटना 19 फेब्रुवारी रोजी सायंकाळी साडेचारच्या सुमारास घडली होती. त्याची गंभीर दखल घेत पुणे पोलिसांनी गजानन मारणे याच्यासह रुपेश मारणे, ओम तीर्थराम धर्मजिज्ञासू, किरण कोंडिबा पडवळ, अमोल विनायक तापकीर, सर्व रा. शास्त्रीनगर, कोथरूड, आणि बाब्या उर्फ श्रीकांत संभाजी पवार, रा. वडगाव रासाई, शिरूर, या सहा जणांवर ‘मकोका’ कारवाई करण्यात आली.
