इंडिया क्राइम न्यूज़ ऑनलाइन
(संपादक सुरेश गुप्ता)
पुणे : पुण्यातील स्वारगेट बसस्थानकातील बलात्कार प्रकरणातीलआरोपी दत्तात्रय गाडेला पोलिसांकडून अटक करण्यात आली आहे. मंगळवारी पहाटे साडे पाचच्या सुमारास स्वारगेट बसस्थानकात उभ्या असणाऱ्या शिवशाही बसमध्ये तरुणीवर आरोपीने लैंगिक अत्याचार केला होता. त्यानंतर आरोपी फरार झाला होता. या घटनेने पुण्यासह संपूर्ण राज्य हादरले आहे. आरोपी दत्तात्रय गाडे दोन दिवसांपासून शिरुर तालुक्यातील गुनाट गावात उसात लपून बसला होता. आरोपी बाहेर येऊन नातेवाईकाच्या घरी येत त्यानं भूक आणि तहान लागलीय असल्याचे बोलला. त्यानंतर नातेवाईकांनी पोलिसांना याबाबत माहिती दिली आणि आरोपी दत्तात्रय गाडेला पुणे पोलिसांनी अटक केली.
जे काही केलं ते चुकीचं, पोलिसांना सरेंडर व्हायचंय..
स्वारगेट बसस्थानकातील बलात्कार प्रकरणातील आरोपी दत्तात्रय गाडे दोन दिवस शिरुर तालुक्यातील गुनाट गावातील उसात लपून बसला होता. पोलिसांकडून गुनाट गावात जवळपास 50 तास शोध मोहीम राबवण्यात आली. रात्री बाराच्या सुमारास गावातील नातेवाईकाच्या घरी दत्तात्रय गाडे आला होता. तिथं जाऊन त्यानं प्रचंड भूक लागलीय, काही तरी खायला द्या. असे म्हटले. यानंतर नातेवाईकांनी त्याला खायला न देता पाण्याची बाटली दिली. त्याचवेळी ‘दत्तात्रय गाडेनं पश्चाताप झाला आहे, जे काही केलं ते चुकीचं आहे. पोलिसांना सरेंडर व्हायचंय’, असं बोलून तो पाण्याची बाटली घेऊन निघून गेला. यानंतर नातेवाईकांकडून पोलिसांना आरोपी गाडेची माहिती कळवण्यात आली.
अन् पोलिसांनी आवळल्या मुसक्या..
आरोपी दत्तात्रय गाडेची माहिती मिळताच पोलीस सक्रिय झाले. पोलिसांच्या 13 टीम तैनात करण्यात आल्या. डॉग स्कॉड तैनात झालं. यानंतर आरोपीला शोधण्यात आलं. तो उसात लपून बसला होता. गाडे गेले दोन दिवस उसात राहत होता. पोलिसांनी त्याला तिथूनचं अटक केली आहे. गाडेच्या अटकेसाठी पुणे पोलिसांचा मोठा फौजफाटा गुनाट गावात दाखल झाला होता.
पुणे पोलीस, क्राईम ब्राँच आणि गुनाट गावच्या ग्रामस्थांच्या संयुक्त प्रयत्नातून दत्तात्रय गाडेला अटक करण्यात यश आलं आहे. गुनाटमध्ये दत्तात्रय गाडेला अटक केल्यानंतर स्वारगेट पोलिसांच्या ताब्यात देण्यात आलं होतं. तसेच पुण्यात आणल्यानंतर दत्तात्रय गाडेला लष्कर पोलीस स्टेशनमध्ये ठेवण्यात आलं होतं. त्यानंतर दत्तात्रय गाडेची पुण्यातील ससून रुग्णालयात वैद्यकीय तपासणी करण्यात आली आहे. आज गाडेला पुण्यातील शिवाजीनगर कोर्टात हजर करण्यात येणार असल्याची माहिती पोलिसांनी दिली आहे.
