इंडिया क्राइम न्यूज़ ऑनलाइन
(संपादक सुरेश गुप्ता)
पुणे : इन्स्टाग्रामवर फॉलोअर्स वाढविण्यासाठी कुख्यात गुंड गजा मारणे याचे व्हिडिओ व्हायरल करून दहशत निर्माण करणाऱ्या चार महाविद्यालयीन विद्यार्थ्यांना ताब्यात घेऊन खंडणीविरोधी पथक दोनने कारवाई केली आहे. संबंधित विद्यार्थ्यांनी गजा मारणेच्या नावाने सोशल मीडियावर पुण्याचा किंग, किंग ऑफ महाराष्ट्र, बादशहा अशाप्रकारचे कॅप्शन लिहून इन्स्टाग्रामवर व्हिडिओ व्हायरल केले होते. त्यांच्याविरुद्ध कोथरूड पोलीस ठाण्यात गुन्हा दाखल केला आहे. दरम्यान, सोशल मीडियाद्वारे व्हिडिओतून दहशत निर्माण करणाऱ्याविरुद्ध कठोर कारवाई केली जाणार असल्याचा इशारा पोलीस आयुक्त अमितेश कुमार यांनी दिला आहे. अक्षय निवृत्ती शिंदे (वय १९, रा. निमगाव खालू, श्रीगोंदा), सिद्धार्थ विवेकानंद जाधव (वय २०, रा. मोहम्मदवाडी), साहिल शाहिल शेख (वय १९, रा. सुंबा, धाराशिव), इरफान हसन शेख (वय १९, रा. सुंबा, धाराशिव) अशी ताब्यात घेतलेल्यांची नावे आहेत. याप्रकरणी पोलीस अमलदार प्रशांत शिंदे यांनी कोथरूड पोलीस ठाण्यात तक्रार दाखल केली आहे.
गुन्हेगारांचे उदात्तीकरण करणारे काही व्हिडिओ सोशल मीडियावर व्हायरल केले जात होते. त्यापार्श्वभूमीवर खंडणीविरोधी पथकाने रील्सस्टार्स यांना बोलावून घेत कारवाईचा बडगा उगारण्यात आला. दरम्यान, कुख्यात सराईत गजा मारणे याच्याही व्हिडिओचे इन्स्टाग्रामवर ग्लोरिफिकेशन केले जात होते. फॉलोअर्स वाढविण्यासाठी मारणेच्या नावाखाली विद्यार्थ्यांकडून व्हिडिओतून दहशत निर्माण केली. किंग ऑफ पुणे, पुण्याचा बादशहा अशा कॅप्शनसह वाहनांचा ताफा, जमलेली गर्दी असे व्हिडिओ व्हायरल केले होते. धमकीवजा इशाऱ्याचे अनेक व्हिडिओ गुन्हे शाखेच्या नरजेत आले. अपर आयुक्त शैलेश बलकवडे, उपायुक्त निखील पिंगळे, एसीपी राजेंद्र मुळीक, वरिष्ठ पोलीस निरीक्षक विजय कुंभार, एपीआय प्रशांत संदे, उपनिरीक्षक गौरव देव, सैदोबा भोजराव, प्रशांत शिंदे, अनिल कुसाळकर, सुरेंद्र जगदाळे, अमोल घावटे, चेतन चव्हाण, चेतन आपटे, अजिनाथ येडे, दिलीप गोरे, गणेश खरात, किशोर बर्गे, रूपाली कर्णवर, आशा कोळेकर यांनी कारवाई केली.
